Мақала қазақстандық студенттердің халықаралық және  ішкі көші-қонының жаңа тенденциясын әлеуметтанулық зерттеу нәтижелерін талдау негізінде анықтауға бағытталған. Авторлар тақырып аясында шетелдік және отандық зерттеулерге баса назар аудара отырып, Қазақстанда студенттердің халықаралық және ішкі көші-қонының қысқа және ұзақ мерзімді себеп-салдарын эмпирикалық зерттеу қажеттілігін айқындайды. Мақалада қазақстандық студенттердің халықаралық және ішкі көші-қонының статистикалық мәліметтеріне сапалы талдау жасалады, ішкі және сыртқы көші-қонның негізгі себептері анықталады және оның кері салдарын алдын алу жолдары теориялық талданады. Қазақстан Республикасы Стратегиялық жоспарлау және реформалар жөніндегі агенттігінің 2020-2021 жылдарға арналған Ұлттық статистика бюросының деректері бойынша жастардың білім беру көші-қонының себептері мен салдарлары талданады.