Мақалада әлемдік қару-жарақ нарығындағы қалыптасқан қазіргі жағдай талданады. Мақаланың авторлары халықаралық қару-жарақ пен әскери техника нарығындағы негізгі ойыншылардың рөлін қарастырады, әлемдік қару-жарақ нарығының негізгі тенденцияларын анықтап, осы нарықтың жағдайын сипаттайтын нақты статистикалық мәліметтерді талдайды.
Жүргізілген талдаудың нәтижесі маңызды динамикалық және құрылымдық өзгерістерге қарамастан әлемде қару-жараққа деген сұраныс та, негізгі қару-жарақ жеткізушілері арасындағы бәсекелестік те азаймай отыр деген қорытынды жасауға мүмкіндік береді. Әскери және саяси шиеленістің күшеюі әлемдік қару-жарақ саудасының өсу қарқынының жеделдеуіне алып келді. Сонымен қоса, әлемдік қару нарығындағы дамудың географиялық векторы өзгеру үстінде. Егер ХХ ғасырдың екінші жартысында Таяу Шығыс импорттаушы елдер ретінде белсенді әрекет еткен болса, ал ХХІ ғасырда әскери өнімдердің әлемдік сауда орталығы Азия мен Мұхит мемлекеттеріне ауысты, мұнда негізгі қару-жарақ импорттау-шылары Үндістан, Пәкістан, Вьетнам, Сингапур, Оңтүстік Корея, Индонезия, Жапония және Аустралия болды. Ал қазіргі таңда қайтадан Таяу Шығыс елдерінен, ең алдымен Сауд Арабиясынан, Катардан, Кувейттен және Египеттен қаруға деген сұраныстың жаңа күрт өсуі байқалуда.