Бұл мақалада мемлекет саясатының басым бағыты ретінде бала құқықтары туралы маңызды тақырып көтерілген. Авторлар бүгінгі күні Қазақстанда балалар құқығы қалай қамтамасыз етілгенін түсінуге тырысты. Тақырыптың өзектілігі еліміздегі балалар саны халықтың 1/3 бөлігін құрайтынымен түсіндіріледі. Сонымен қатар, Қазақстан Президенті Қ.Қ. Тоқаев халыққа арнаған жаңа жылдық жолдауында 2022 жылды «Балалар жылы» деп жариялады.

  Мақалада әлеуметтік саясаттың негізгі бағыттары қарастырылды. Сондай-ақ балалардың құқықтарын қорғауға бағытталған әлеуметтік шаралардың тиімділігі және бүгінгі таңда бұл салада қандай қиындықтар бар екендігі туралы шолу жасалды. Авторлар балаларға қатысты зорлық-зомбылық, инклюзивті білім берудің нашар дамуы, балабақшалар мен мектептердің жетіспеуі, сондай-ақ заңнамадағы олқылық сияқты қазақстандық қоғамдағы балалардың құқықтарын қамтамасыз етудің негізгі мәселелеріне талдау жасаған. Мақалада «Балалар жылында» қол жеткізілген негізгі жетістіктер де атап өтілген.