Бұл зерттеу тұтыну қоғамындағы студент жастардың тұлға болып қалыптасуына әлеуметтену процесінің алатын маңызын, оны жүзеге асырудағы сән құбылысының ықпалын талдауға бағытталған.  Зерттеудің негізгі мақсаты  - студенттік ортадағы тұтынушылық тәжірибенің ерекшеліктері мен механизмдерін анықтау болып табылады. 

Қоғам арнайы зерттеуді қажет ететін әртүрлі әлеуметтік топтардан тұрады. Осы орайда студенттер қоғамның ең кәсіби бағдарланған және перспективалы бөлігін құрайды. Сондықтан студенттік ортадағы тұтынушылық тәжірибенің қандай дәрежеде іске асатынын нақтылау үшін оны тиянақты зерттеп, дұрыс  бағалау қажет. Қазіргі заманда студент жастардың көпшілігі тұтынушылық сұраныстың шыңында және ғылыми-техникалық прогрестің қарқынды даму циклінде өмірге келіп, қалыптасқандықтан олар, көбінесе, өздерінің адами мәртебесін түрлі аксессуарлар тағу, сәнді киім кию арқылы танытуға машықтанған. Демек, студент жастардың тұтынуға қатысты мінез-құлқының негізгі тетігі болып табылатын заманауи сәнді заттар жастардың әлеуметтік-мәдени құндылықтарында басымдыққа ие маңызды аспект болып табылады. Мақалада студент жастардың әлеуметтену процесіне сән құбылысының ықпалын анықтау мақсатында  2023 жылы  жүргізілген зерттеу нәтижелері  ұсынылған. Зерттеу нәтижелері студенттік ортадағы тұтынушылық тәжірибені жүзеге асыру механизмдерінің дұрыс жолға қойылмағандығымен сипатталып отыр. Эмпирикалық зерттеулер әртүрлі факторлардың студенттердің тұтынушылық тәжірибелерін қалыптастыруға әсер етудегі нәтижелерін талдауға мүмкіндік береді. Студенттік ортадағы тұтынушылық тәжірибенің дамуын зерттеу  практикалық маңызға ие.