Бұл мақала Қытай Халық Республикасының мәдени дипломатиясын жаһандық халықаралық тәртіптің трансформациясы жағдайында «жұмсақ күш» стратегиясын жүзеге асырудың негізгі құралдарының бірі ретінде зерттеуге арналған. Тақырыптың өзектілігі халықаралық аренада мемлекеттің ықпалын нығайту мен оң имиджін қалыптастырудағы мәдениеттің артып келе жатқан рөлімен анықталады. Зерттеудің мақсаты — ҚХР-дың мәдени дипломатияға қатысты стратегиялық тәсілдерін талдау, оның жұмыс істеу ерекшеліктерін анықтау және бұл бағыттың тиімділігін Қытайдың ресми дискурсы мен халықаралық қабылдауы тұрғысынан бағалау. Зерттеудің ғылыми жаңалығы мәдени дипломатияны идеологиялық, институционалдық және коммуникациялық механизмдердің синтезі ретінде кешенді түсіндіруге ұмтылуында. Мақалада қолданылған әдістемелік негіз ретінде дискурстық талдау, жүйелік және салыстырмалы тәсілдерді қамтитын пәнаралық көзқарас қолданылды. Зерттеу нәтижесі бойынша, Қытайдың мәдени дипломатиясының ауқымдылығы мен институциаланғанына қарамастан, оның тиімділігі жарияланған құндылықтар мен ел ішіндегі нақты саяси тәжірибе арасындағы қайшылықтармен шектеледі деген тұжырым жасалды. Бұл зерттеу Қытайдың жұмсақ күшінің ерекшелігін тереңірек түсінуге ықпал етіп, халықаралық қатынастар, сыртқы саясат және қоғамдық дипломатия салаларындағы ғылыми дискурстың дамуына үлес қосады. Зерттеу нәтижелерінің практикалық маңызы – оларды сыртқы саяси стратегияларды қалыптастыру мен Қытайдың халықаралық имиджін талдау кезінде қолдануға болады.