Бұл зерттеу жұмысы жаһандану және әлеуметтік өзгерістер жағдайында Қазақстанның оңтүстік өңірлеріндегі гендерлік рөлдердің қалыптасуы мен трансформациясын қарастырады. Зерттеудің мақсаты Қазақстанның оңтүстік өңірлері тұрғындарының гендерлік сәйкестігі мен қоғамдағы рөлдерінің қалыптасуына тарихи-мәдени дәстүрлер мен қазіргі заманғы транс-формациялық процестердің (урбанизация, жаппай цифрландыру және ақпараттық ашықтық) өзара ықпалын кешенді түрде анықтау және талдау. Зерттеу сандық және сапалық әдістер негізінде жүргізілді. Эмпирикалық деректерді жинау үшін Қазақстанның оңтүстік облыстарын (Қызылорда, Түркістан, Шымкент, Тараз, Алматы және Жетісу) қамтитын Google Forms платформасындағы онлайн сауалнама пайдаланылды. Іріктеме көлемі 750 респондентті құрады, бұл репрезентативтілікті және демографиялық әртүрлілікті қамтамасыз етті. Сауалнама отбасы институты, еңбек бөлінісі, білім беру және қоғамдық белсенділік мәселелерін қамтыды.

Зерттеу нәтижелері оңтүстік өңірлерде дәстүрлі гендерлік модельдер мен инновациялық көзқарастардың қатар өмір сүретінін, кейде өзара қайшылыққа түсетінін көрсетті. Дәстүрлі құндылықтардың беріктігіне қарамастан, ақпараттық технологиялар мен білім деңгейінің өсуі гендерлік теңдікке деген жаңа көзқарастардың қалыптасуына әсер етуде.

Алынған деректер аймақтағы әлеуметтік саясатты жетілдіруге және гендерлік теңдікке бағытталған мәдени-ағартушылық бағдарламаларды әзірлеуге ғылыми-тәжірибелік негіз болады.