Мақалада жас отбасы түсінігі, мәртебесі, негізгі мәселелері мен отбасылық құндылық аспектілері қарастырылған. Отбасы әлеуметтік институт ретінде қалыптасу мен даму кезеңінде әртүрлі сатылардан өтіп, белгілі бір функцияны атқарады. Жас отбасы қандай қоғамда болмасын өмірлік қиындықтармен кездесетіндіктен мемлекет, қоғам тарапынан қолдауды қажет етеді. Жас отбасының материалдық қажеттіліктері мен мұқтаждықтары, олардың туындау себептері мен салдарлары және оларды шешу жолдары осы зерттеудің өзегі болып отыр. Жаңадан неке құрған жастар арасындағы рухани-моральдік өзара түсіністікті, олардың дүниетанымдық көзқарастары, мақсаттары мен мұраттарын зерделей отырып, отбасында туындайтын әртүрлі кереғар құбылыстардың себептерін ашуға талпыныс жасалды.